Treochlár chun deireadh iomlán a chur le spleáchas an Aontais ar fhuinneamh na Rúise

Laghdaigh an tAontas a sciar d’iompórtálacha gáis ón Rúis ó 45% go 19% a bhuí le Plean REPowerEU a seoladh i mí na Bealtaine 2022 chun spleáchas an Aontais ar fhuinneamh na Rúise a laghdú. Mar sin féin, tháinig méadú arís ar iompórtálacha gáis ón Rúis in 2024. Dá bhrí sin, tá treochlár curtha i láthair ag an gCoimisiún Eorpach chun a chinntiú go gcuirfidh an tAontas deireadh iomlán lena spleáchas ar fhuinneamh na Rúise, agus soláthairtí agus praghsanna cobhsaí fuinnimh a chinntiú ar fud an Aontais ag an am céanna. 

Leis an treochlár, cuirfear deireadh de réir a chéile le hola, gás agus fuinneamh núicléach na Rúise i margadh an Aontais ar bhealach comhordaithe slán agus de réir mar a aistríonn an tAontas chuig fuinneamh glan. Faoi dheireadh 2025, ullmhóidh na Ballstáit pleananna náisiúnta ina leagfar amach conas a rannchuideoidh siad le deireadh a chur de réir a chéile le hiompórtálacha gáis, fuinnimh núicléach agus ola ón Rúis. An tráth céanna, leanfar de na hiarrachtaí chun dlús a chur le haistriú fuinnimh an Aontais agus lena chuid iarrachtaí chun soláthairtí fuinnimh a éagsúlú ar mhaithe le deireadh a chur leis na rioscaí do shlándáil an tsoláthair agus do chobhsaíocht an mhargaidh. 

Cuimsítear sa treochlár bearta chun an méid seo a leanas a dhéanamh: 

• gás: deireadh a chur le hiompórtálacha gáis uile na Rúise faoi dheireadh 2027 trí fheabhas a chur ar thrédhearcacht, monatóireacht inrianaitheacht ghás na Rúise ar fud mhargaí an Aontais. Cuirfear cosc ar chonarthaí nua le soláthróirí gáis ón Rúis agus cuirfear deireadh le spotchonarthaí (le haghaidh íocaíocht láithreach) faoi dheireadh 2025.
• ola: gníomhaíocht nua a dhéanamh chun aghaidh a thabhairt ar ‘scáthchabhlach’ na Rúise (soithí atá in úsáid ag an Rúis chun smachtbhannaí a sheachaint) lena n-iompraítear ola
• núicléach: srian a chur le conarthaí soláthair nua a chomhshínigh Gníomhaireacht Soláthair Euratom d’úráiniam, úráiniam saibhrithe agus ábhair núicléacha eile a thagann ón Rúis 

Trí dheireadh a chur de réir a chéile le fuinneamh na Rúise, le treochlár REPowerEU, laghdófar na rioscaí slándála atá roimh an Aontas. Cuirfidh sé freisin leis an bplean eacnamaíoch a leagtar amach sa Chompás Iomaíochais, sa Chomhaontú maidir le Tionsclaíocht Ghlan agus sa Phlean gníomhaíochta um fhuinneamh inacmhainne. Cuidíonn córas fuinnimh neamhspleách atá níos glaine chun borradh a chur faoin ngeilleagar agus, ag an am céanna, cuireann sé go mór le huaillmhianta dícharbónaithe na hEorpa. Cuirfidh an Coimisiún tograí reachtacha ar aghaidh chun tacú leis an treochlár an mhí seo chugainn. 

Tuilleadh eolais 

Treochlár REPowerEU

Slándáil an tsoláthair gáis 

Slándáil an tsoláthair ola 

Preaseisiúint: An tAontas chun deireadh iomlán a chur lena spleáchas ar fhuinneamh na Rúise